Loading...

Gjithçka që duhet të dini për kujdesin ndaj bebeve në dimër


Si ta kuptoni që bebja po sëmuret, si ta mbroni nga ftohja në dimër, shenjat që bebja juaj është sëmurë, sa kohë duhet kaluar jashtë në ajër të pastër gjatë dimrit dhe mbrojtja e veçantë për lëkurën, 10 këshilla që fëmija juaj (dhe ju!) të bëni gjumë të mirë natën, 11 arsye pse bebja juaj qan. Si ti mbrojmë foshnjat nga i ftohti dhe rreziqet i kanosen foshnjes gjatë dimrit. Këto e shumë këshilla të tjera për fëmijët tuaj në suplementin e fundjavës në “Tirana Observer”

Virozat e stinës, të shtohet kujdesi për fëmijët
Gjatë ditëve të fundit janë shtuar komplikacionet shëndetësore te fëmijë për shkak të paqëndrueshmërisë së temperaturave. Përgjithësisht komplikacionet e shfaqura janë ato të bllokimit të rrugëve të frymëmarrjes, laringitet, anginat, çrregullimet gastrointenisnale etj. Shfaqja klinike e këtyre virozave të stinës është e ndryshme nga njëri fëmijë te tjetri. Por shenjat më të dukshme janë temperatura e lartë dhe nuk janë të pakta rastet e pacientëve që paraqiten me temperaturë të lartë në ditët e fundit. Gjithashtu te shumë fëmijë këto komplikacione shoqërohen edhe me të vjella dhe heqje barku. Simptoma të tjera janë dhimbjet e kyçeve dhe dobësia trupore që shfaqin. Duhet të themi se shfaqja e këtyre simptomave është e ndryshme nga një individ tek tjetri, pasi mund të ndodhë që jo të gjitha të manifestohen tek i njëjti pacient. Kategoritë më të rriskuara janë fëmijët e moshave 2 deri 6 vjeç. Menjëherë sapo të shfaqen simptomat e para të sëmundjes, qoftë edhe njëra prej tyre, është e këshillueshme që prindi ta çojë fëmijën për vizitë te mjeku specialist. Është kategorikisht e ndaluar marrja e ilaçeve qetësuese në barnatore pa u vizituar më parë fëmija. Kjo për faktin se duke përdorur këto ilaçe pa rekomandim ka ndodhur që te shumë fëmijë gjendja shëndetësore është përkeqësuar më tej, në vend që të përmirësohej. Kjo për faktin se efektet e ilaçeve të marra kanë rënë në kundërshtim me reagimin që bën trupi i fëmijës. Prandaj është shumë e nevojshme që më parë të vizitohet fëmija te mjeku specialist dhe vetëm më pas të përdoren barnat. Megjithatë, duhet theksuar se trajtimi me barna i pacientëve të sëmurë është i ndryshëm sipas shkallës së problemeve të shfaqura. Trajtimi i këtyre virozave ndryshon në varësi të veçorive individuale të pacientëve të vegjël. Megjithatë, prindërit duhet të tregojnë shumë kujdes në mosmbajtjen e fëmijëve në ambiente të mbyllura, sepse kështu rrezikojnë të përforcojnë sëmundjen më shumë. Gjithashtu është e nevojshme që të konsumohen sa më shumë lëngje me përbërje vitaminash të ndryshme dhe marrja e sasive të shumta të lëngjeve të frutave. Kujdes duhet treguar edhe në veshje. Kështu, nëse fëmija manifeston simptomat e mësipërme, nuk duhet të vishet trashë, sepse në atë formë kalojnë në rëndim tjetër të sëmundjes për shkak edhe të djersitjes së shumtë. Ambienti në të cilin qëndrojnë duhet të ajroset vazhdimisht. Ndërsa këshillat e tjera më specifike jepen nga mjeku specialist, sepse simptomat e sëmundjes shfaqen në forma të ndryshme te pacientët
Shenjat që bebja juaj është sëmurë
Më poshtë janë 8 shenja sëmundjeje për foshnjat nën 6 muaj, dhe këshilla të përgjithshme se kur keni nevoje vërtet për të thirrur një mjek.
1. Temperatura
Vetë temperatura nuk është sëmundje, por është përgjigja e bebit ndaj një sëmundje- zakonisht ndonjë infeksioni. Telefonojini doktorit nëse foshnja është më i vogël se 3 muaj dhe ka temperature rektale mbi 38 graëe, ose nëse bebi juaj është mes 3 dhe 6 muajsh dhe ka temperaturë mbi 38 e tre gradë Celsius. Edhe nëse temperature është meëe ulët se këto, telefonojini mjekut nëse bebi ka skuqje, irritohet, nuk do të ushqehet, mezi merr frymë, qafë të ngurte, vjellje ose diare të vazhdueshme, dhe tregon shenja dehidratimi.
2. Dehidratim
Dehidratimi mund të ndodhe nëse bebi nuk po ushqehet siç duhet, ka temperature, është në një mjedis shumë të ngrohtë, ose ka diare dhe vjellje të vazhdueshme. Mund t’a dalloni dehidratimin nëse bebi ka gojën ose mishrat e thatë, e lag pampersin më rrallë, nuk nxjerr lot kur qan ose kur fontaneli (pjesa e butë në majë të kokës) duket sikur po zhytet ngadalë. Nëse mendoni se bebiëeshtë i dehidratuar telefononin mjekun.
3. Diarre
Diarea është e zakonshme tek të miturit, por telefononi mjekun nëse; shihni gjak në jashtëqijte (e cila mund të duket e kuqe e ndezur, ose akoma më keq, e zezë), bebi bën çiçin më shumë se 6 herë në ditë ose nuk pi lëngje, ose tregon shenja dehidratimi.4. Vjell
Të miturit zakonisht nxjerrin pështymë, por duhet të shqetësoheni nëse vjell shpesh. Vjellja nuk është serioze nëse ndodh vetëm një ose dy herë. Gjithsesi, nëse ndodh më shpesh, përmban gjak ose është jeshile në ngjyrë, ose nëse bebi duket i dehidratuar, telefononi mjekun.
5. Vështirësi në frymëmarrje
Nëse bebi ka probleme në frymëmarrje, duhet të telefononi mjekun urgjentisht.
Shenjat e mëposhtme tregojnë se bebi ka probleme me frymëmarrjen:
Bebi merr fryme më shpesh se zakonisht, indi midis brinjëve, poshtë dy kockave të shpatullave, ose në pjesën e sipërme të barkut thithet brenda kur bebi merr frymë. Koka e bebit rri e varur buzët ose lëkura e bebit merr ngjyre të kaltërt.
6. Skuqje, rrjedhje ose gjakderdhje
Nëse kërthiza e bebit tuaj ose penisi i skuqet, ka rrjedhje ose nxjerr gjak, njoftoni menjëherë mjekun. Këto janë shenja të një infektimi.
7. Puçrra
Puçrrat (me skuqje lëkure), janë normale tek bebet, por telefonojini një mjeku nëse puçrrat mbulojnë një pjesë të madhe, sidomos ne fytyre, ose shoqerohet nga temperature, rrjedhje, gjakderdhje enjtje, ose nëse pucrat duken të infektuara.
8. Te ftohtit
Infeksione të frymëmarrjes shkaktohen nga një virus dhe janë të shpeshta tek të miturit. Zakonisht zgjasin 1 ose 2 javë duke u shoqëruar me rrjedhje hundesh, temperaturë dhe oreks të dobët për disa dite, dhe nje kolle qe mund te zgjase 2 deri ne 3 jave. Simptoma më të renda kërkojnë kujdesin e mjekut.
Telefonojini mjekut nëse: Temperatura e bebit është më e lartë se 38 për të miturit nën 3 muaj ose më e lartë se 38 e tre për të miturit midis 3 dhe 6 muaj.
Nëse bebi ka skuqje dhe vështirësi në frymëmarrje përshkruar si më sipër.
Bebi juaj grindet dhe qan shumë. Kolla e bebit tuaj është e rëndë e nuk pushon, ose nëse nxjerr dhe gjak. Bebi po vjell. Simptomat e bebit zgjasin më shumë se 2 javë.
Së fundmi, në të gjitha rrethanat, në qofte se ju jeni shumë e shqetësuar pasi fëmija juaj duket me të vërtetë i sëmurë, besojini instinkteve tuaja dhe thirrni mjekun
Çfarë duhet të bëni para se ti jepni foshnjes ilaçin
Si të kujdeseni për foshnjen e ftohur
Kur është fjala për kujdesin ndaj foshnjeve, shumë prindër janë në mëdyshje nëse e mirëmbajnë higjienën e foshnjes në mënyrë të rregullt apo se si të veprojnë në raste të ftohjeve.
Dhënia e ilaçeve
Ilaçet në formë sirupi mund të jepen me anë të lugëzës, pipetës apo shishes. Sido që të jepet, duhet respektuar doza e përshkruar. Ilaçe të caktuara, nëse jepen madje edhe në doza më të vogla se sa për të rritur, mund të jenë toksike për foshnjen.
Veprimi i drejtë
Vendosni fëmijën në pozitën gjysmëulur. Mbushni pipetën me sirup, fusni me kujdes pipetën në gojën e foshnjes, dhe lëshoni lëngun e sirupit anash gojës së foshnjes por jo shumë thellë. Foshnja ka refleks të thithes dhe shpesh hedh jashtë përmbajtjen përmes pështymës. Pas marrjes së ilaçit jepini foshnjes për të pirë ujë apo qumësht, në mënyrë që të gëlltisë më mirë ilaçin.
Këshilla e mjekut
Të njëjtin veprim mund ta zëvendësoni edhe me shiringën e injeksioneve. Nëse pediatri ua rekomandon gjysëm lugëze të kafesë me ilaç, ju mund ti jepni foshnjes me anë të shiringës 2,5 ml ilaç, ndërsa nëse ua rekomandon një lugëz të tërë kafeje, kjo nënkupton ti jepni foshnjes 5 ml ilaç.
Hedhnja e pikave në sy
Konjuktivi, pezmatimi mukozalës e cila njomë pjesën e mbrendshme të kapakëve të syve dhe të bardhës së syrit, shpesh lajmërohet tek të posalindurit. Mjeku do t`ua përshkruajë pikat apo kremin për sy, të cilat sipas udhëzimit duhet ti përdorni tek fëmija juaj.
Veprimi i drejtë: Para se ti hidhni pikat apo lyeni kremin, së pari duhet ti pastroni sytë e foshnjes me një gazë me tretje fiziologjike, duke filluar nga cepi i brendshëm nga ana e hundës, deri në cepin e jashtëm të syrit. Mbani kokën e foshnjes me një dorë dhe kthejeni në një anë, të kundërt me atë në të cilën do ti hidhni pikat. Me anë të gishtit të madh dhe gishtit tregues ndani kapakun e epërm me atë të poshtëm. Hidhni pikën në cepin e brendshëm të syrit, duke patur kujdes që maja e shishes apo pipeta të mos e prek syrin.
Këshilla e mjekut: Nëse vendosni krem antibiotik, vendoseni në gishtin tregues paraprakisht të pastruar mirë, dhe me një lëvizje të shpejtë, nga cepi i brendshëm gjer në atë të jashtëm, në nivel të qerpikëve të kapakut të epërm, lyeni kremin në syrin e foshnjes. E dobishme është që paraprakisht syrin ta pastroni me tretje fiziologjike dhe ta masazhoni lehtë gjendrrën e lotëve e cila ndodhet në cepin e brendshëm të syrit.
Matja e temperaturës
Matjen e temperaturës më së lehti mund ta bëni me anë të termometrit elektronik, të cilin mund ta bleni në secilën farmaci. Mos përdorni termometër me merkur, të cilët janë të ndaluar në treg.
Veprimi i drejtë: Pastroni termometrin me ndihmën e vatës me ndonjë dezinfektues. Kapni shputat e foshnjes, ngritini këmbët lehtësisht dhe vendoseni termometrin me shumë kujdes në anus. Me të dëgjuar sinjalin, hiqeni termometrin dhe kontrolloni në ekran se sa është temperatura. Kjo mënyrë e matjes quhet rektale, ndërkaq krahas kësaj mënyre egziston edhe ajo aksilare (nën sqetull), ndërsa më të rralla janë matjet në vesh, në gojë dhe në ballë. Temperatura normale aksilare është 37 gradë, ndërsa ajo rektale është 37,5 gradë. Temperatura e lartë kërkon përdorim të ilaçeve për të zbritur temperaturën.
Këshilla e mjekut: Temperatura e lartë zbret së pari duke i hequr foshnjes rrobat e tepërta. Kontrolloni temperaturën në hapësirë, e cila nuk duhet të jetë më e madhe se 24 – 25 gradë. Nga rreziku i dehidrimit, duhet ti jepni foshnjes sa më shumë ujë dhe çajra, të cilat nuk duhet të jenë të ngrohtë, por të temperaturës së dhomës. E rëndësishme është që disa herë gjatë ditës ta lani foshnjen me ujë të vakët, me kohëzgjatje prej 10 minutash. Nëse temperatura nuk zbret duhet ti jepen ilaçe si paracetamoli (eferalgan) apo ibuprofeni (brufen) nga 6 gjer në 8 orë.
Çfarë duhet të bëni para se ti jepni foshnjes ilaçin
Gjithmonë lexoni udhëzimin para se ti jepni foshnjes ilaçe. Po ashtu, kontrolloni afatin e skadimit dhe mënyrën e përdorimit të ilaçit. Më e sigurtë është që foshnjes ti jepni ilaç me ndihmën e shiringës, sepse ashtu nuk do të gaboni në dozën – gjysmë lugëze është 2,5 mililitra.
Para se ti hidhni pika në sy, kaloni përmes syrit të foshnjes me një tretje fiziologjike duke filluar nga ana e mbrendshme nga hunda. Atëherë mund ti hidhni pikat. Keni kujdes në afatin e skadimit të pikave.
Familja me anëtar të ri
Një mesazh i veçantë për nënat
Një nga arsyet që muaji i pare është shumë i vështirë, është se ju akoma nuk e keni marrë veten nga stresi i shtatzanisë e i lindjes. Mund të duhen javë para se trupi juaj të normalizohet (sidomos mbas epiziotomisë – prerjes dhe qepjes vaginale, apo operacionit). Gjithashtu mund të keni dhe ndryshime të humorit, si rezultat I ndryshimeve hormonale që ndodhin në trupin tuaj. Mund të keni shpërthime të qari pa ndonjë arsye të veçantë, ose depresion të lehtë në javët e para. Këto emocione mund të shtohen nga lodhja që vjen nga pagjumësia. Nëse ju provoni të ashtuquajturën ‘’paslindjen blu’’ ose depresionin e paslindjes, mund të ndjeheni jo normale, të turpëroheni apo të mendoni se jeni nënë e keqe. Kujtohuni që kjo është normale mbas lindjes.
Edhe baballarët nganjëherë ndjehen të mërzitur dhe të çuditshëm mbas ardhjes së një bebi të ri në shtëpi. Për të ruajtur veten nga dominimi i simptomave blu në jetën tuaj dhe mbi gëzimin e bebit, shmangni vetizolimin në javët e para. Mundohuni të pushoni kur bebi pushon, kështu nuk do të mbilodheni. Në se këto shqetësime vazhdojnë më tepër se disa javë, apo bëhen më të rënda, kërkoni ndihmën e një specialisti, psikoterapisti apo psikologu. Vizitorët mund të ndihmojnë për të kaluar momentet blu, duke gëzuar së bashku me ju për ardhjen e bebit. Por ata mund të jenë edhe të lodhshëm për ju dhe të dëmshëm për bebin, duke e ekspozuar ndaj infeksioneve. Prandaj pakësoni numrin e vizitorëve gjatë javëve të para. Kërkojini vizitorëve të lajmërojnë përpara se të vijnë dhe të bëjnë vizita të shkurtra, dhe nëse bebi juaj shqetësohet nga njerëzit, mos lejoni njeri jo të familjes ta mbajë apo t’i afrohet. Nëse shqetësoheni nga telefonatat, hiqni zilen e telefonit dhe vendosni sekretarinë telefonike. Me ardhjen e bebit është e vështirë të merresh njëkohësisht dhe me punët e shtëpisë. Kërkoni ndihmë nëse keni mundësi, nëse jo bëni më të domosdoshmet. Tani përqëndrohuni vetëm tek bebi.
Një mesazh i veçantë për baballarët
Kjo periudhë është shumë stresuese për çiftin. Është pothuaj e pa mundur të gjejnë kohë dhe aq më pak energji për njëri tjetrin. Ndërmjet kërkesave pa fund të bebit, nevojave të fëmijëve të tjerë, punëve të shtëpisë dhe punës, nëse bashkëshortët nuk ndihmojnë njëri tjetrin, do të fillojë një përleshje midis tyre. Në këtë kohë disa baballarë e ndjejnë veten të mënjanuar nga vëmendja dhe afeksioni i nënës për fëmijën, sidomos kur fëmija është me gji. Problemi vështirësohet akoma më shumë, sepse marrëdhëniet seksuale janë të ndaluara për disa javë nga mjeku, por edhe po të ishin të lejuara, shumica e grave nuk janë të interesuara në aktivitetin seksual për njëfarë kohe mbas lindjes, si pasojë e lodhjes fizike dhe stresit emocional. Ky konflikt si dhe ndjenja e xhelozisë që mund të nisë në këtë kohë, është e përkohshme. Shpejt jeta do të hyjë në rutinën e vet të zakonshme, që do t’ju japë dhe një herë pak kohë për vete, për të rindërtuar jetën tuaj seksuale dhe sociale.
Ndërkohë, bëni përpjekje të kaloni pak kohë vetëm ju të dy. Dhe mos harroni se të puthurat dhe përkëdheljet janë të nevojshme edhe për njëri-tjetrin, jo vetëm për bebin.
Për këto arsye, është shumë e rëndësishme që babai të harxhojë ca kohë duke luajtur dhe mbajtur bebin. Kjo do ta lidhë më shumë emocionalisht me bebin. Bebet me baballarët qeshin dhe lëvizin këmbët dhe duart edhe më shumë se me nënën. Me nënën loja është më e qetë dhe më e butë. Për bebin të dyja këto janë të rëndësishme, prandaj në kujdesin për të duhet të përfshihen të dy prindërit.
Vëllezërit dhe motrat
Me ardhjen e bebit, fëmija tjetër e ndjen veten të braktisur. Ai mund të jetë mërzitur që në momentin që nëna shkon në spital, sepse është hera e parë që ndahet për kohë të gjatë prej saj, por edhe kur nëna kthehet në shtëpi, fëmija nuk arrin të kuptojë se ajo është e lodhur dhe s’ka fuqi të luajë me të. Për më tepër tani të gjithë merren me bebin dhe i kushtojnë gjithë vëmendjen që dikur i kushtohej atij. Është në dorë të prindërve të sigurojnë fëmijën se e duan dhe vlerësojnë shumë dhe ta ndihmojnë të kuptojë situatën e re të krijuar në familje.
Këtu janë disa sugjerime si të ndihmojmë fëmijët më të mëdhenj dhe t’i përfshijmë në jetën e bebit në javët e para:
• Nëse është e mundur merrini fëmijët të vizitojnë nënën dhe bebin në maternitet.
• Kur të ktheheni në shtëpi me bebin, sillini një dhuratë fëmijës tjetër për të festuar së bashku.
• Caktoni një kohë për ta kaluar vetëm, me secilin nga fëmijët.
• Kur të bëni fotografi bëni disa vetëm me fëmijët e rritur si dhe nxirrni fëmijët bashkë me bebin.
• Kërkojini gjyshërve dhe të afërmve t’i marrin në shëtitje në kopshtin zoologjik, në një film, ose thjesht për drekë. Kjo mund t’i ndihmojë në çastet kur ndihen të braktisur.
• Sidomos në muajt e parë, kur ushqyerja me gji është e shpeshtë, ata mund të bëhen xhelozë nga intimiteti që ju keni me bebin gjatë ushqyerjes. Tregojini se ju mund ta ndani këtë intimitet duke treguar përralla, histori, duke lexuar libra dhe duke bërë biseda. Gjatë kësaj kohe mund të krijohet mundësia të flisni dhe për problemin e xhelozisë. Kjo do t’i ndihmojë ta pranojnë më lehtë situatën.
Sa kohë duhet kaluar jashtë në ajër të pastër gjatë dimrit dhe mbrojtja e veçantë për lëkurën
Si ti mbrojmë foshnjat nga i ftohti dhe 
rreziqet i kanosen foshnjes gjatë dimrit
A duhet shëtitur foshnja dimrit?
Temperaturat e ulëta nuk janë pengesa për shëtitjet gjatë dimrit me fëmijët tuaj. Gjyshet sigurisht nuk do të pajtoheshin në lidhje me këtë, por foshnjen duhet që çdo ditë ta ekspozoni në ajër të pastër, duke filluar kështu prej javës së dytë pas lindjes. Me foshnjet që kanë lindur gjatë periudhës së dimrit duhet të jemi më të vëmendshëm dhe të presim ti mbushin një muaj që të fillojmë me shëtitjet. Kohëzgjatjen e shëtitjes duhet rritur gradualisht nga dita në ditë që të mësohet foshnja me ajrin e pastër. Temperaturat e ulëta nuk janë pengesa për shëtitjet, përderisa nuk ka rënie të temperaturës në -10 gradë Celsius. Të vetmet pengesa në dimër janë era, shiu apo bora me shi, si dhe mjegulla. Meqë dimrit paraditet janë më të ngrohta, mundohuni që ritmin e foshnjes ta sinkronizoni dhe të shëtitni çdo ditë paraditeve. Shëtitjet me prindërit apo edhe me gjyshërit, përmirësojnë në përgjithësi gjendjen e fëmijës, sepse ajri pastër ndikon në apetit, gjumë, disponim si dhe në rezistencën ndaj infeksioneve. Gjatë shëtitjes foshnja mëson tingujt, objektet, ambientin, njoftohet me botën e jashtme si dhe anasjelltas.
Si ta vesh beben dimrit?
Meqë tek vogëlushët gjer në dy vjeç, trupi vështirë adaptohet me temperaturat e ulëta dhe shpejtë mund të ftohet, duhet që ti veshim mirë me rrobe më të trasha. Skafanderët gjatë dimrit janë të mirëseardhur sepse mbrojnë shpinën e foshnjeve. Kapela, shalli dhe dorëzat janë pjesë të rëndësishme të veshjes gjatë dimrit, si dhe me rëndësi të veçantë janë çizmet të cilat duhet të jenë të përshtatshme për dimër, nëse foshnja juaj ka filluar të ecën. Nëse fëmija juaj ka filluar të ecë dhe të kënaqet në borë, në rastet nëse rrobet dhe çizmet i janë lagur atëherë duhet ti ndërroni menjëherë. Është gjë e mençur nëse dorëzat i lidhni me ndonjë lidhëse dhe i futni nën mëngët e skafanderit, ashtu që të mos i humbisni! Fëmijën sipas rregullës duhet veshur ashtu si vishen prindërit. Por, edhe nëse jashtë është vetëm pak freskët, foshnja duhet të mbajë kapele. Nëse temperatura është rreth zeros, veshët e foshnjes duhet të jenë të mbuluara me kapele, duart me dorëza dhe fyti me shall. Nëse fryn erë, me shallin e foshnjes duhet ti mbulohet edhe fytyra por jo edhe hunda. Gjithsesi, në periudhën e dimrit merrni me vete gjatë shëtitjes edhe mbrojtësen për karrocë, në rastet e ndërrimit të motit, mund ta mbroni foshnjen tuaj. Po ashtu, edhe nëse gjatë shëtitjes bëhet ngrohtë, mund ti hiqni ndonjë nga palët e rrobeve nga foshnja. Kur hyni në ndonjë ambient të ngrohtë, madje edhe për ca minuta, foshnjen duhet ta bëni të ndihet rehat. Duhet të keni kujdes që të mos e mbështjellni foshnjen së tepërmi, sepse mund të pësojë ndonjë sulm termik. Ekspertët pohojnë që mbështjellja e foshnjeve gjatë muajve të dimrit, kur gripi dhe infeksionet tjera respiratore janë më të përhapura, mund të shkaktojë sindromin e vdekjes së papritur të foshnjave (SIDS).
Sa kohë duhet kaluar jashtë
në ajër të pastër gjatë dimrit?
Se sa kohë do të kaloni në ajër të pastër varet se çfarë është temperatura e jashtme. Nëse temperatura është e ulët, edhe nëse foshnja e mbështjellur mirë nuk do të duhej të qëndrojë gjatë jashtë. Nëse foshnja i ka duart e nxehta dhe po ndihet mirë, atëherë mund të qëndroni jashtë ende. Nëse duart e foshnjes janë të ftohta dhe ajo është e parehatshme, atëherë sigurisht është koha të hyni brenda (përveç në rastet kur mund të jetë edhe e uritur, e etur apo nëse e ka bërë nevojën) atëherë është koha ti ktheheni ngrohtësisë së shtëpisë suaj. Nëse fillon të qajë, gjithsesi përfundojeni shëtitjen. Mos të ju brengosë nëse hunda e foshnjes rrjedh përderisa jeni jashtë, kur të hyni në ambient të ngrohtë do të duhej të ndalonte.
A i duhet mbrojtje e veçantë
lëkurës së foshnjes gjatë dimrit?
Lëkura e foshnjes mund të bëhet e thatë dhe mund të pëlcasë nga era. Për këtë përdorni ndonjë krem më të yndyrshme të posaçme për lëkurën e foshnjave. Nëse foshnja përdorë cucllën apo nëse i kanë dalë dhëmbët dhe i rrjedh pështyma duhet t`ia pastroni faqet kohëpaskohe ashtu që të mos i pëlcasë lëkura. Nëse jeni në pushime në vende ku ka shumë borë, fëmija do të duhej të përdorë syze mbrojtëse si dhe kremën mbrojtëse me faktorë të lartë UV. Për zgjedhjen dhe përdorimin e kremës mbrojtëse konsultohuni me pediatrin tuaj sepse sikurse tek të rriturit edhe tek fëmijët lëkura e tyre ndryshon. Sapunet dhe kemikalet e thajnë lëkurën, për këtë në periudhën e dimrit duhet ti përdorni më me masë. Pas larjes mos e fërkoni lëkurën e foshnjes, vetëm thajeni me peshqir ujin. Gjatë periudhës së dimrit është mirë që të keni lagështi në ajrin e dhomës së foshnjes, që t`ia lehtësoni frymëmarrjen.
Cilat rreziqe i kanosen foshnjes gjatë dimrit?
Duhet të brengoseni seriozisht nëse hunda, veshët, faqet apo gishtërinjtë e foshnjes mbeten shumë të ftohtë dhe marrin ngjyrë blu-hiri. Kjo tregon morth dhe mund të shkaktojë lëndime serioze. Në këtë rast foshnjen duhet ngrohur urgjentisht: zhvishni pallton tuaj dhe përqafojeni foshnjen që t`ia rritni temperaturën e trupit përmes temperaturës tuaj të trupit dhe sa më shpejt që mundeni vizitoni mjekun apo shërbimin e ndihmës së shpejtë. Nëse nuk keni mundësi që të vizitoni mjekun shpejtë, mundohuni që ta ngrohni foshnjen në shtëpi, sepse mund të përkeqësohet situata. Vendin e ngrirë të trupit duhet ta ngrohni në ujë i cili është i ngrohtë pak mbi temperaturën normale të trupit, në asnjë mënyrë më shumë se 39 gradë Celsius (gjithsesi përdorni termometër!) ose përdorni lecka të së njëjtës temperaturë, të cilat nuk duhet shtypur. Leckat duhet përdorur derisa lëkura të kthejë ngjyrën e saj dhe gjithsesi jepni foshnjes të thithë apo të pijë lëng të ngrohtë (kurrë shumë të nxehtë).Nëse lëkura e foshnjes merr ngjyrë të kuqe, flluska apo fryhet, koha është për vizitën e mjekut – më së miri është që mjeku të ju vizitojë në shtëpi, që të mos e ekspozoni foshnjen përsëri në ajër të ftohtë.
Këshilla për kohën e gjumit të fëmijës tuaj
10 këshilla që fëmija juaj (dhe ju!)
 të bëni gjumë të mirë natën.
1. Kthejeni gjumin në prioritet familjar dhe pjesë të veprimtarive tuaja ditore. Vendosni sa orë gjumë kërkon çdo anëtar i familjes tuaj dhe sigurohuni që ta bëjnë këtë. Diskutoni me mjekun e fëmijës mbi problemet e gjumësisë, sepse pjesa më e madhe e tyre trajtohen lehtësisht.
2. Mësoni t’i dalloni problemet e gjumit tek fëmija juaj. Duhet të vëreni detaje të tilla, si: vështirësi për të rënë në gjumë, zgjim nga ëndrrat e këqija, gërhitje, rezistencë për të shkuar në shtrat, vështirësi në frymëmarrje ndërsa flenë. Këto probleme të gjumit mund të lidhen edhe me sjelljen gjatë ditës, si: lodhje jashtë normales, gjendje e përgjumur ose sjellje tekanjoze.
3. Punë në grup. Është mirë që ju ta diskutoni në grup strategjinë dhe të punoni si skuadër. Nëse po filloni një program për natën, pasi keni kaluar vështirësi me fëmijën tuaj, shpjegojani çfarë prisni nga fëmija, nëse ai është i rritur.
4. Këmbëngulja. Si në të gjithë aspektet e mëmësisë, këmbëngulja dhe vijueshmëria janë përbërësit kyç për suksesin. Pa ato, ju nuk mund të prisni që fëmija juaj të mësojë apo të ndryshojë sjelljen.
5. Vendosni një orë ekzakte gjumi dhe zgjimi. Kjo gjë vendos një rregull për ju dhe fëmijën tuaj dhe ju lejon të planifikoni regjimin e kohës së gjumit. Përndryshe, ju mund të keni tendencën të flini vonë. Për më tepër kjo ndihmon që fëmija të ruajë kohën e brendshme trupore ose ritmin ditor në një cikël 24 orësh. Nuk ka një kohë ideale se, kur duhet të flejë çdo fëmijë, sepse nevojat e gjumit dhe regjimi i fjetjes ndryshojnë në mënyrë të konsiderueshme.
6. Regjim, regjim, regjim. Regjimi vendos një rregull dhe ndihmon në sjellje; një regjim i kohës së gjumit ndihmon fëmijën tuaj të mësojë të jetë përgjumësh, ashtu siç leximi në krevat i vë të rriturit në gjumë (madje edhe larg krevatit). Struktura e kohës së gjumit gjithashtu shoqëron dhomën e gjumit me ndjesi të mira dhe ofron një ndjesi sigurie dhe kontrolli. Regjimi heq stresin nga dhoma e gjumit dhe ndihmon që ajo të jetë një kohë speciale, veçanërisht nëse keni më shumë se një fëmijë.
Koha e gjumit është koha që të çlodheni. Kështu që, aktivitetet qetësuese, si: një banjo e ngrohtë, një libër ose ndoshta një masazh i këndshëm janë zgjedhje të mira. Mbajini televizorët, kompjuterët dhe pajisje të tilla larg dhomës së gjumit, sepse ato mund të zgjojnë fëmijën tuaj dhe t’ju mbajnë zgjuar deri vonë.
Mësojani fëmijës tuaj çfarë është regjimi, limitet kohore që duhen përfshirë në të dhe fokusohuni pas tyre. Shpesh është shumë e nevojshme t’i lajmëroni se, koha ka përfunduar, si psh: “Kemi edhe tre faqe për të lexuar”, por jini strikt dhe mos i tejkaloni limitet tuaja.
Pasiguria ushqen tension dhe mund të ketë edhe debate pas kësaj. Një qëllim thelbësor në regjimin e fëmijës tuaj është t’i mësoni fëmijës të qetësohet, të bjerë vetëm në gjumë dhe ta zë gjumi vetë gjatë natës kur i del gjumi. Çelësi për ta arritur këtë qëllim është që, prindërit t’i lënë vetëm fëmijët e tyre pak kohë para se t’i zërë gjumi.
7. Vishini dhe kujdesuni për temperaturën e dhomës. Sërish, nuk ka rregulla absolute, por një gjë është e sigurt: visheni fëmijën tuaj siç visheni edhe vetë, duke pasur parasysh që fëmijët e vegjël zbulohen shpesh gjatë natës dhe nuk janë në gjendje të mbulohen sërish. Njerëzit zakonisht flenë më mirë në një dhomë të freskët (por jo të ftohtë), sesa në një dhomë të ngrohtë.
8. Objektet kalimtare. Koha e gjumit do të thotë ndarje dhe kjo mund të bëhet më e thjeshtë me një objekt kalimtar, si psh: kukull, arush me push, batanije ose diçka e tillë. Këto objekte ofrojnë një ndjesi sigurie dhe kontrolli që rehaton dhe siguron fëmijën tuaj.
9. Dhoma dhe ndarja e krevatit. Disa prindër ndiejnë se, ndarja e dhomës së tyre të gjumit apo e krevatit me fëmijën, është më e natyrshme, sesa të kenë dhoma të ndara; dhe ky fakt është i rëndësishëm për zhvillimin emocional të fëmijës.
Duke marrë në konsideratë disa çështje sociale dhe psikologjike, zakonisht të ndash krevatin nuk është një ide e mirë. Së pari, çdo njeri fle më mirë vetëm; do të thotë që ka më pak shqetësime gjatë gjumit dhe gjumi mund t’i dalë më pak herë.
Fëmijët në të njëjtin krevat apo dhomë gjumi mund të mos mësojnë të flenë vetë dhe kanë tendencën të kenë probleme me gjumin. Mbytja e fëmijëve, kryesisht atyre të vegjël është gjithashtu një problem gjatë fjetjes në të njëjtin krevat.
Një fëmijë në krevat me ju mund të ketë pasoja serioze në jetën tuaj intime dhe seksuale; ta lini fëmijën me dadon gjithashtu mund të jetë një problem. Sa më gjatë të flejë me ju në krevat fëmija, aq më e vështirë bëhet ndarja kur ai apo ajo duhet të shkojë në dhomën e tyre.
Të fjeturit ndarazi është gjithashtu i rëndësishëm të ndihmojë një fëmijë të mësojë të nda­het pa ankth dhe të formojë identitetin e vet.
10. Një gjë të fundit. Fëmijët gjithmonë do të lënë diçka për në fund: të puthurën, përqafimin, një gotë me ujë apo të shkuarin në banjo. Ata shpikin shumë gjëra. Bëni maksimumin që t’i paraprini këto kërkesa dhe t’i keni bërë përpara se të shtrihen në krevat. Dhe … mësojuni fëmijëve se, nga momenti që ata janë në krevat, nuk duhet të lëvizin më prej tij.
Si t’ia bëni më të mirë gjumin fëmijës (dhe vetes tuaj!)
-Pavarësisht moshës, oraret e rregullta dhe regjimi i kohës së gjumit ndikojnë të kemi një gjumë të mirë dhe të shëndetshëm; e njëjta gjë vlen edhe për fëmijët, madje edhe më shumë.
-Të vendosësh e të ruash zakone të mira gjumi ndihmon fëmijën ta zërë gjumi, të rrijë në gjumë dhe të zgjohet i freskët e i çlodhur, duke parandaluar problemet e gjumësisë në të ardhmen. Zakonet e mira të gjumit jo vetëm që ju largojnë stresin në kohën e gjumit, por ndihmojnë që ta kthejnë atë në kohën më të veçantë për ju dhe fëmijën tuaj.
-Nuk ka rregulla të vështira për sjelljen e gjumit dhe si gjithmonë ka variacione tek individë të veçantë. Fëmija juaj është unik. Nëse regjimi funksionon, atëherë kjo është më e mira për ju. Kjo do të thotë që, disa mënyra funksionojnë më mirë se të tjerat dhe këshillat e mëposhtme jepen që të jenë të efektshme.
Biberoni dhe fëmija juaj
Biberoni (mema) për shumicën e prindërve paraqet “shpëtimin” e vërtetë. Kur fëmija qan, dhe s’është i sëmurë, bebironi, do të jetë ai që të paktën, për pak kohë, do ta qetësojë.
Biberoni është menduar për të kënaqur nevojën e bebit tuaj për të thithur, por jo për të zëvendësuar vaktet. Pra, afrojini bebit tuaj biberonin ndërmjet vakteve ose pas vaktit, atëherë kur jeni të sigurt se bebi është i ngopur.
Disa prindër nuk duan që t’ua ofrojnë bebironin fëmijëve ose ia japin me vonesë, prandaj beba edhe e refuzon. Nëse fëmija është mësuar të thithë gishtin, me siguri do ta refuzojë mermen, sepse tashmë është mësuar me ndjenjën e gishtit në gojë. Prandaj, nëse keni ndërmend t’ia jepni memen bebes suaj, më së miri është që këtë ta bëni në javët e para të lindjes së bebes.
Prindërit kanë mendime të ndryshme mbi biberonët për nga forma. Disa nuk pranojnë idenë të qetësojnë bebin me një objekt dhe të tjerë mendojnë në mënyrë të gabuar, se biberonët mund ta dëmtojë. Biberonët nuk shkaktojnë ndonjë problem mjekësor apo psikologjik. Ai është menduar për të kënaqur nevojën e bebit tuaj për të thithur, por jo për të zëvendësuar vaktet. Pra, afrojini bebit tuaj biberonin ndërmjet vakteve ose pas vaktit, atëherë kur jeni të sigurt se bebi është i ngopur. Në qoftë se ju i ofroni biberonin kur është i uritur, ai do nevrikoset. Se bebironi përdoret për të ndihmuar bebin, prandaj lëreni të vendosë nëse e do apo kur e do atë.
Po t’i dalë gjumi nga rënia e biberonit ju duhet ta ndihmoni. Duhet të zgjidhni biberon të pandashëm, që mund të zihet, të lahet. Deri sa të bëhet gjashtë muajsh duhet të ziejë disa herë në ditë, që bebi të mos rrezikohet nga infeksionet, sepse sistemi i tij imunitar është duke u pjekur. Mbas kësaj moshe rreziku që ai të marrë një infeksion të tillë është shumë i vogël. Lajeni me sapun dhe shpëlajeni me ujë.
Ka dy masa biberonash, njëri për gjashtë muajt e parë dhe tjetri për fëmijët mbi këtë moshë. Mbasi të gjeni cilin preferon bebi juaj, blini më shumë se një, pasi shpesh ato bien në tokë apo nuk i gjeni atëherë kur ju duhen më shumë. Megjithatë, asnjëherë mos e zgjidhni këtë problem duke ia varur bebit në qafë, sepse mund ta mbysë.
Si mund të ndahet nga gjiri fëmija më i vogël se 6-të muajsh
Nëse detyroheni ta lini fëmijën para 6-muajve ai do ushqehet me biberon. Kështu që është mire që ai të mësohet me biberonin dhe nga laktacioni para se të lihet. Pak nga pak, çdo ditë një vakt gji dhe ndonjë vakt me biberon duke ja rritur numrin e vakteve me biberon. Meqë ai mund të mos dojë të pijë me biberon, mirë është që atë ta ushqej një njeri tjetër dhe jo pranë nënës. Nëse përsëri refuzon provoni biberonë me kokë të ndryshme. Përdorni ushqime të ndryshme të këshilluara nga doktori. Gjithashtu do të jetë më e lehtë ta pranojë biberonin gjatë gjumit.
Nëse fëmija ka mbushur 6-të muaj mund të mos ketë nevojë për biberon. Tashmë ai ka filluar të marrë ushqim me lugë, me gotë apo filxhan. Pak nga pak një vakt mund t”i jepet me ushqime shtesë duke mundësuar pakësimin e qumështit të gjirit.
Lexo në pako kur të blesh biberon. Aty duhet të shkruan që biberoni është tip i pranuar, që i plotëson direktivat e parashtruara nga Enti i Konsumit.
Bërë vet një kontroll sigurie:
* Një biberon nuk guxon të ketë spango, shirit apo diçka tjetër, që mund të lidhet rreth qafës së fëmijës. Ka ndodhur që fëmijët e vegjël mbërthehen/lidhen dhe mbyten.
* Spangoja e mbajtjes së biberonit nuk guxon të jetë më e gjatë se 22 centimetra. Kjo është masa përreth qafës së një fëmije gjashtë mujor.
* Pjesa e gjerë, duhet të jetë aq e madhe, ashtu që të mos mund t´i futet fëmijës në gojë. Preferohet të ketë vrimë ventilimi.
* Shih pjesën që e thithë. Ajo nuk guxon të ketë vrimë ose shenja nga e gërvishtura, e cila ngadalë mund të shkëputet nga armatura e vet.
·    Provo e tërhiqe pjesën thithëse të biberonit, secilën herë, para se t´ia japësh fëmijës. Materiali, me kalimin e kohës, bëhet i brishtë.
Sindroma e foshnjës së shkundur, pakujdesia që kushton shumë
Të shkundurit bën që truri të lëvizë brenda kafkës dhe të ndrydhet nga të goditurit në ashtin e kafkës. Kjo ndrydhje shkakton të ënjturit, gjakderdhjen dhe presionin në tru. Enët e gjakut mund të pëlcasin, nervat të dëmtohen dhe retina e syrit mund të shkëputet ose nervat optike të gërvishten, gjë që mund të sjellë verbërinë.
Ç’është sindroma e foshnjës së shkundur?
Është një grup simptomesh të lëndimeve të shkaktuara nga shkundja e foshnjës. Të shkundurit e foshnjës mund të shkaktojë këto gjendje serioze:
* Lëndimi i syrit dhe/ose verbërimi
* Lëndimi i trurit
* Konvulsioni (spazma)
* Paraliza
* Zhvillimi i vonuar
* Vdekja
Ç’ndodh kur shkundet foshnja
Koka e foshnjës është më e madhe dhe më e rëndë se pjesa tjetër e trupit, dhe deri në moshën dyvjeçare apo edhe më shumë, muskujt e tij të qafës nuk janë aq të fortë sa të mund të mbajnë kokën. Të shkundurit bën që truri të lëvizë brenda kafkës dhe të ndrydhet nga të goditurit në ashtin e kafkës. Kjo ndrydhje shkakton të ënjturit, gjakderdhjen dhe presionin në tru. Enët e gjakut mund të pëlcasin, nervat të dëmtohen dhe retina e syrit mund të shkëputet ose nervat optike të gërvishten, gjë që mund të sjelle verbërinë.
Pse e shkundim foshnjën
Të shumtën e herëve shkundja e foshnjës ndodhë nga frustrimi i prindit apo kujdestarit në përpjekje për t’ia ndalur vajin foshnjës. Rastet e tjera ndodhin nga aksidentet apo lojërat e vrazhda, siç është të hedhurit e fëmijës në ajër, të ngriturit poshtë-lart ose të luhaturit në rreth. Foshnjat mund të përjetojnë dëmtim të muskujve të zverkut. Disa prindër e dinë se fëmija nuk duhet të goditet, por ata nuk e kuptojnë se të shkundurit është shumë i dëmshëm. Lëndimet nga të shkundurit mund të jenë rezultat edhe i vrapimit apo kërcimit poshtë e lartë me foshnjën.
Si mund të parandalohet sindroma e foshnjës së shkundur
* Bëhuni të vetëdijshëm për aktivitetet që mund të shkaktojnë lëndime.
* Kur e përqafoni, e ngitni apo e lëshoni foshnjën gjithmonë mbajeni me dorë kokën e saj.
* Përpiquni të ndalni zemërimin ose frustrimin para se nevoja për ta goditur apo shkundur fëmijën të bëhet e pakontrollueshme. Merrni frymë thellë. Vëreni fëmijën në shtratin apo koshin e tij, që të jetë i sigurt dhe dilni nga dhoma. Nëse jeni vërtetuar se me fëmijën çdo gjë është në rregull, atëherë mund ta leni të qajë derisa ju të qetësoheni. Nganjëherë fëmijët qajnë pa ndonjë arsye ose kur janë shumë të lodhur.
* Kërko këshillim profesional për të mësuar aftësitë e perceptimit para se të bëhet ndonjë dëm. Mos lejoni që zemërimi t’ia zë vendin kënaqësisë që mund ta përjetoni me fëmijën tuaj.
* Nëse e keni shkundur fëmijën tuaj apo nëse mendoni se dikush e ka bërë këtë, menjëherë kërko ndihmë mjekësore.
* Kërkon ndihmën e mjekut nëse foshnja qanë për një kohë të gjatë ose jeni të shqetësuar për shëndetin e saj.
11 arsyet pse qajnë foshnjat
Foshnjat qajnë. Kjo është mënyra se si ato komunikojnë kur janë të uritura, kur kanë dhembje, frikë, nevojë për të fjetur apo diç më shumë. Pra si është e mundur që prindërit të supozojnë se çfarë komunikon foshnja e tyre? Do të jetë e vështirë që të interpretoni të qajturit e foshnjes tuaj, sidomos në fillim. Këtu kemi arsyet më të shpeshta pse qajnë fëmijët. Nëse i vogli juaj vajton dhe ju nuk e dini pse-në, hidhini një sy listës së mëposhtme. Mundësitë janë që të gjeni diçka që mund të ndihmojë.
1. Uria
Kjo është gjëja e parë që mendoni kur foshnja juaj qan.
Të mësuarit për ti kuptuar shenjat e urisë do të ju ndihmojë që të filloni ushqyerjen e foshnjes para se të fillojë të qajë. Ja disa nga shenjat: bezdisja, plaquritja e buzëve, refleksi i foshnjave që shkakton që të kthejnë kokën nga dora juaj kur ju e lëvizni drejt faqeve të foshnjes dhe vënja e duarve në gojën e tyre.
2. Pelena e papastër
Disa foshnja jua bëjnë të kuptoni kur kanë nevojë për tu ndërruar. Disa të tjera mund të tolerojnë pelenën e papastër për një kohë.
3. Nevoja për të fjetur
A nuk janë foshnjet me fat? Kur ato janë të lodhura, menjëherë mund të flejneë – kurdo dhe kudo. Apo vetëm kështu mendojnë të rriturit.
Në të vërtetë, është më e vështirë se sa që mendoni. Foshnjat mund të qajnë dhe bezdisen nëse janë të lodhura, sidomos nëse janë të tejlodhura.
4. Dëshira për ta mbajtur
Foshnjet kanë nevojë për tu përkëdhelur. Ato kanë dëshirë që të shikojnë fytyrat e prindërve, të ndëgjojnë zërat e tyre dhe mund të ndjejnë aromën e tyre unike. Të qarat mund të jenë mënyra e tyre e kërkesës për tu mbajtur.
Ju mund të pyeteni se a mund ta llastoni duke e mbajtur shumë, por gjatë muajve të parë të jetës kjo është e pamundur. Por për ti dhuruar krahëve tuaj pak pushim, provoni ndonjë hobe apo ndonjë mjet mbajtës për foshnja (kengur).
5. Telashet me stomak (gazrat, dhembja e stomakut, etj)
Telashet me stomak janë të lidhura me gazrat apo dhembjet që shkaktojnë të qara. Në fakt, gjendja misterioze e dhembjes së stomakut, definohet si të qajturit e pangushëllueshëm për më së paku 3 orë në ditë, 3 ditë në javë apo edhe 3 javë në muaj.
Nëse foshnja juaj shpesh bezdiset dhe qan menjëherë pas ushqyerjes, mund të ketë telashe me stomak. Shumë prindër provojnë pikat anti gazra për foshnja apo gripe ëater (i pregatitur nga bimët dhe sodë bikarboni). Kërkoni miratimin e mjekut para përdorimit të tyre.
Nëse dyshoni në gazra, provoni diç të thjeshtë për të eliminuar dhembjen si psh shtrijeni foshnjen në shpinë, mbajani shputat dhe lëvizni ato në mënyrë të lehtë si pedalimi i biçikletës.
Zbuloni mundësitë tjera që mund të shkaktojnë dhembjen e stomakut, si alergjitë e qumështit, gripi stomakut, joteleranca ndaj laktozës, kapsllëku apo bllokimi i zorrëve.
6. Nevoja për të gromësuar
Gromësimi nuk është i detyrueshëm. Por nëse foshnja juaj qan pas ushqyerjes, një gromësim mund të jetë e gjitha çfarë i nevojitet.
Fëmijët thithin ajër gjatë gjidhënjes apo nga thithja nga shishja, dhe nëse ajri nuk lirohet mund të shkaktojë ca shqetësime. Disa foshnja janë të shqetësuara nga ajri në stomak, gjersa disa të tjera nuk kanë nevojë për të gromësuar.
7. Shumë ftohtë apo shumë nxehtë
Kur foshnja juaj ndihet e ftohtë, sa që edhe kur ju i heqni rrobat për të ndërruar pelenat apo për ta pastruar me leckë, ajo mund të protestojë duke qajtur.
Të posalindurit dëshirojnë që të lidhen dhe të mbahen të ngrohtë – por jo shumë të nxehtë. Si rregull, ato ndihen komfort duke veshur edhe një shtresë më shumë, se që ju keni nevojë që të jeni komfort. Foshnjet më pak ankohen kur e kanë të nxehtë se sa kur e kanë ftohtë, dhe ato asnjëherë nuk qajnë për këtë gjë shumë fuqishëm.
8. Diçka e vogël
Foshnjet mund të trazohen nga diçka e vogël sa edhe mund të jetë ndonjë fije peri i vockël apo ndonjë qime floku rreth gishtit të tyre, që ndalon qarkullimin. Disa foshnja janë tepër të ndjeshme ndaj gjërave që gërvishtin si materiali i rrobave apo ndonjë tiketë rrobash.
9. Dalja e dhëmbëve
Dalja e dhëmbëve mund të jetë e dhimbshme për foshnjen tuaj, sa edhe dalja e secilit dhëmb veç mund të krijojë dhimbje të ndryshme. Disa foshnja durojnë më shumë se të tjerat, por të gjitha bëhen të bezdisshme dhe qaramane.
Nëse ju duket që foshnja juaj ka dhimbje dhe nuk e dini saktësisht përse, provoni që tia prekni ducat me gishtërinj. Mund të befasoheni duke zbuluar ndonjë gungë të fortë tek dhëmbët e foshnjes që janë në rrugë e sipër.
Mesatarisht, dhëmbët e parë dalin ndërmjet 4 dhe 7 muajve, por mund të ndodh edhe më herët.
10. Të ndjerit i tejdërrmuar
Foshnjet mësojnë nga të stimuluarit e botës rreth tyre, por ndonjëherë e kanë të vështirë që ti procesojnë të gjitha – dritën, zhurmën, lëvizjen e të mbajturit nga dora në dorë. Të qajturit mund të jetë formë e shprehjes mjaft më.
11. Të mos ndjerit mirë
Nëse ju i keni kuptuar të gjitha nevojat e foshnjet dhe e keni rehatuar dhe ai përsëri vazhdon të qajë, mund të jetë të mos ndihet mirë për diçka. Mund të provoni të matni temperaturën apo të shikoni për ndonjë shenjë të ndonjë semundje.
Të qarat e foshnjes së sëmurë drejtojnë kah shkaktari i të qenit i uritur apo i frustruar. Nëse foshnja juaj qan dhe nëse juve kjo gjë nuk ju duket shumë në rregull, besojini instikteve tuaja dhe kontaktoni mjekun.
Çfarë të bëni nëse foshnja juaj ende qan
Stomak i mbushur? Kontrolloni. I pushuar mirë? Kontrolloni. Nuk ka temperaturë? Kontrolloni.
Pra, përse foshnja juaj qan? Foshnjet kanë arsyet e tyre të mira. Por edhe prindërit më të ditur nuk mund të lexojnë trurin e foshnjave të tyre – dhe foshnjet nuk dijnë të flasin që të na tregojnë çfarë nuk është në rregull.
Fatmirësisht, ju mund ti ofroni rehati pa e ditur çfarë shkakton shqetësimin e foshnjes tuaj.
Home item

Follow by Email

ADS

Arkivi

Popular Posts

Labels

Erotika Suplemente Fëmijët Diabeti Reumatizma Zemra Flokët Lëkura Hipertensioni Kanceri Mjekësia popullore Gjumi Këshilla Ushqimi Veshkët Bimët mjekèsore Gjaku Psikologji Tensioni Ushqyerja Alergjitë Astma Kujtesa Migrena Mëlçia Prostata Receta Sëmundjet e zemrës Anemia Artriti Bimët mjekësore Bukuria Depresioni Dhimbjet e kokës Dieta Frymëmarrja Infarkti Këmbët Këshilla dhe receta popullore Maskat Obeziteti Pagjumësia Stomaku Sytë Sëmundjet Sëmundjet e gjakut Sëmundjet e veshkave Temperatura Tiroidet Truri Ulçera Veshët Zorrët 100 vjeç Alzheimer Amniocenteza Ankthi Aparati tretës Arterioskleroza Artroza Babai Bronkiti kronik Dhëmbët Diarreja Droga E qeshura Ekzema Epilepsia Erëzat Fyti Gastriti Gjimnastika Gjinjtë Gjoksi Goditjet në tru Gratë Gurët në tëmth Halitoza Hemorragjia cerebrale Hudhra Humbja e kujtesës Insomnia Kaloritë Kanceri i mushkërive Kanceri në prostatë Karrota Kolesteroli Kosi Kremi solar Kuriozitete Laksativët Meningjiti Menopauza Mostretja Mushkëritë Narkolepsia Ngjyrat Orgazma Osteoporoza Pankreasi Parainfarkti Parfumi Pijet Piramida ushqimore Plakja Plazhi Prindërit Psikoterapia pozitive Puthja Qarkullimi i gjakut Qeshja Rrudhat Seksi&dashuria Sheqeri Sinoziti Sperma Spondiliatroza Sëmundjes së veshkave Sëmundjet e mëlçisë Sëmundjet e trashëgueshme Sëmundjet më të shpeshta Sëmundjet seksuale Temperatura e lartë te fëmijët Tradhtia Tretja Të ndryshme Uji i detit Urina Vajrat bimorë Video Vitaminat

Random Posts